2017ko abenduaren 17a da. Jendez gainezka dago BEC. Iluntzea gerturatzen ari da, une batetik bestera esango dute txapeldunaren izena. Maialen Lujanbio eta Aitor Mendiluze buruzko buruko jarduna bukatzen ari dira. Bietako bat izango da garaile, baina ez dago argi nor. Urduritasuna sumatzen da entzuleen artean. Halako batean, gai jartzaileak mikrofonotik esan du irabazlearen izena: Maialen Lujanbio. Txaloak. Txistuak. Malkoak. Bukaerako agurrak bota dituzte. Listo, amaitu da ekitaldia. Jendea eserlekuetatik altxa eta kanpora doa, aurpegi irribarretsuz. Guztiek alde egin dutela egiaztatu ondoen, antolatzaileek ateak itxi dituzte. Lehengo txalo, txistu eta malkoen tokian isiltasuna nagusitu da. Erabat hustu da BEC. Ez dago arima bakar bat ere barruan. Edo hori ematen zuen, behintzat.
